4 քայլ, թե ինչպես կահավորել ննջասենյակը, ինչպես 5-աստղանի հյուրանոցում

Ինչի՞ն ենք այդքան երկար սպասում ճամփորդելիս, բացի իհարկե տեսարժան վայրեր այցելելուց։

Մի՞գուցե հենց փափուկ անկողնու մեջ ընկղմվելուն։ Այո, հյուրանոցային սենյակում ննջասենյակի կահույքի տեսքը ամենատպավորիչներից է, բայց ոչ ամենաանհասանելին։ Հիմա միասին կհասկանանք, թե ինչպես ստանալ հինգաստղանի հյուրանոցի սենյակի տեսք հենց ձեր տանը։

1․ Անկողնային պարագաներն ամենակարևորն են

Ճամփորդելիս սպասում ենք, թե երբ ենք մտնելու մաքուր ու մետաքսյա փափկությամբ անկողնու մեջ։ Ու  կապ չունի երկու ժամ եք քնելու, թե 8 ժամ, քնելու ընթացքին ոչինչ չպետք է խանգարի։ Դրա համար էլ անկողնային պարագաների ընտրությանը մեծ ուշադրություն պետք է դարձնել։ Սովորաբար նախընտրելի է ընտրել շնչող բամբակե սպիտակ կտորից անկողնային պարագաներ, որոնք կընդգծեն ճոխության ու շքեղության էֆֆեկտը սենյակում։ 4 սովորական փետուրից բարձերն ու 2 ակցենտային բարձերը բավական են հարմարավետ քնի ու տեսքի համար։ Ինչքան բարձերն ավելի փափլիկ լինեն, այնքան ավելի ճոխ տեսք կունենա ձեր ննջասենյակի կահույքը։ Կարևոր է նաև ընտրել ձեզ հարմար բարձրության ներքնակներ, կամ հաճախակի փոխել մյուս կողմի վրա։ Չմոռանաք շաբաթը երկու անգամ լվանալ սպիտակեղենն դրա «շրխկան», թարմ ու մաքուր տեսքն ապահովելու համար։ Առավոտյան անկողնու կոկիկ հավաքելն էլ ձեր լավ օրվա գրավականներից մեկն է և երեկոյան վերադառնալով ննջասենյակ կզգաք հինգաստղանի հյուրանոցում հանգստանալու առավելությունը ձեր իսկ տանը։

2․ Ննջասենյակի կահույք․ մահճակալ, պահարաններ

Ննջասենյակի կահույքի ձեռքբերումն ամենաժամանակատար ու ծախսատար գործողություններից է, բայց, ինչպես ասում են, պետք չէ խնայել ձեր առողջության ու հարմարավետության հաշվին։ Իհարկե, նախընտրելի են բարձր մահճակալները, քանի որ դրանից վերկենալը կամ պառկելն ավելի հեշտ է, բայց սա նաև կախված է հենց այն ինտերիերից, որտեղ որ այն տեղադրվելու է։ Ամերիկյան ինտերիերներին բնորոշ են բարձր մահճակալները, իսկ ասիականներին՝ ցածր։ Մյուս հատկանշական առանձնահատկությունը մահճակալների հետ կապված մահակների առկայությունն է, որն ապահովում է ամրություն ու առաձգականություն։ Երկտեղ մահճակալների համար 30 մահակ, իսկ մեկտեղանիների ու մեկուկեստեղանիների համար՝ 15։ Սա էլ հենց մահճակալների էրգոնոմիկ հարմարավետության կարևորագույն կետն է։

Ննջասենյակն այն սենյակներից է, որտեղ ամենաշատ պահոցների կարիքը կա։ Սկսած կողապահարաններից, հայելիով պահարանից մինչև զգեստապահարան, ամենքն էլ միանգամայն ծառայելու են իրենց նախանշված նպատակներին։

3․ Գլխավոր աքսեսուարներ

Բարձրաճաշակ հյուրանոցներում սենյակները երբեք «խեղդված» չեն տարատեսակ աքսեսուարներով։ Ծաղկամանով ծաղիկներ, լուսամփոփ կամ ժամացույց․ ահա, թե ինչ կտեսնեք կողապահարանի վրա։ Այստեղ նույնպես կարող եք սահմանափակվել երեքի կանոնով, այսինքն՝ ընդհամենը 3 դեկոր յուրաքանչյուր պահարանի վրա։ Պատերին կարող է կախված լինել մեծ ժամացույց, մեծ նկար կամ հայելի։ Հյուրանոցային սենյակները կարիք չունեն մեծ լինել, ոչ էլ ձեր ննջասենյակը, դրա փոխարեն կարող եք սենակում կախել հայելին տեսողական ընդարձակ դարձնելու համար։ Նկարների շնորհիվ սենյակին կհաղորդեք ձեր անհատականությանը բնորոշ գծեր և այն հաստատ կտարբերվի տասնյակներից։ Եթե մոդեռնի երկրպագու եք, նախընտրեք վերացական պատկերով նկար, իսկ եթե ձեր ննջասենյակը դասական ոճով է կահավորված, ընտրեք բնության համայնապատկերով նկարներ։

4․ Գորգեր

Դե, ինչ ննջասենյակ առանց նուրբ ու փափուկ գորգերի։ Հիշում ենք, որ գորգերը գոնե պետք է ծածկեն մահճակալի առջևի ոտքերը։ Գորգեր գնելիս կարևոր է հաշվի առնել սենյակի ակտիվ ելումուտը։ Ամեն առավոտ մահճակալից վեր կենալիս և ոտքերդ դիպչելիս փափուկ գորգին ձեզ կզգաք ինչպես թագավորական պալատում։ Եթե չեք ուզում բազմերանգությամբ լցնել սենյակը, ընտրեք չեզոք գույներով գորգ։

Բարձրակարգ հյուրանոցները տարբերվում են իրենց գերհարմարավետությամբ, որն իրենից ներկայացնում է մինիմալ կահույք ու դեկորներ, թարմ ու նոր լվացված սպիտակեղեն, փափլիկ բարձեր։ Հենց այս մանրուքներն են հնարավորություն տալիս լիովին հանգստանալ, թուլացնել սթրեսը ու վայելել ժամանակը, բայց ինչպես վերևում ներկայացվեց, այս ամենը մի քանի կախարդական քայլերի շնորհիվ կարելի է իրականացնել նաև տանը։